月供股票股權

喺考慮月供股票計劃嘅時候，都可能會諗到派息安排。月供股票買入嘅股份享有嘅股東權益同一手買入嘅股份一樣。即現金或實物派息同紅股等，都會按所擁有嘅股數計算。而代收股東權益的手續費，例如處理股息，都已包含在每月嘅月供計劃費用中。所以不論所持股票每年派多少次息，都唔會衍生額外手續費同交易成本。

不論擁有嘅股數足唔足夠一手，所享有嘅股權都冇分別。以今日(5月31日)除淨嘅中電為例，每股派息$0.63，雖然一手要500股，但即使擁有50股亦會享有相應股息。$31.5嘅股息會全數於派息日存入戶口。

月供股票派息優點

用現金派息嘅情況下，月供計劃長遠能節省代收股東權益的手續費。以恆生銀行(011)為例，一年派4次股息，大部分銀行代收股東權益的手續費為股息嘅0.5%，最低收費係$30。換言之，如果擁有一手股票，每年淨收股息已經需要支付$120，加上存倉費同買入手續費，所需嘅交易成本不菲。而月供計劃不論派息次數，都無需額外繳交手續費。尤其當擁有股數愈多，經一般交易買入嘅股票派息嘅手續費一旦過左$30，就要按比例收費(0.5%)。喺擁有相同股數下，月供計劃都只係會收取每月手續費。換言之，月供計劃所能節省嘅額外手續費支出會隨住所買入股數嘅增長而變得明顯。

月供股票派息缺點

不過喺用紅股派息嘅情況下，月供計劃長遠會蝕底少少。以中華煤氣為例，5月30日紅股除淨，每10股送1股。如果經一般交易買入嘅股票，一手有1000股，派息後就有1100股，下一次再派息就有1210股，如此類推。但用月供計劃買入嘅股數每個月都唔同，好容易累積"零頭"。假如喺除淨日擁有157股，十送一下紅股應為15.7股，但因為唔會有0.7股，所以實際只有15股紅股。而下年就會有(157+15=172) x 1.1 = 189.2，同樣道理只有17股進帳(189-172=17股)。雖然相應金額不大，但亦值得留意。

總而言之，使用月供計劃購入股東權益活動頻密嘅股票(例如一年派四次息)，長遠能節省更多手續費。

月供股票買入時間

月供股票嘅優點係會每月定期買入已選擇嘅股票，雖然唔需要自己衡量即時嘅價格而作出買入嘅決定，但大家應該都有興趣知究竟月供股票係幾時執行交易。

要知道哩個答案，首先要認清三個日期。第一係供款日，供款日係預留相應款項用作交易嘅日子。第二係扣數日，只會喺信用卡供款嘅計劃先有，如果係用戶口自動過數供款就不需理會。第三係交易執行日，即係用預留嘅款項進行交易嘅日子。

中銀月供股票買入時間

以中銀嘅月供股票計劃為例，供款日係每月第十日，如非交易日則順延至下一個交易日。信用卡扣數日係供款前兩個交易日，信用卡戶口嘅信用額會喺哩日開始扣起月供計劃嘅款項。交易日係供款日後第一交易日。2019年5月嘅供款時間表如下:

而喺供款日嘅交易時間，以2019年5月供中電、中華煤氣同中移動為例(請參考買入月供股票詳情)。中電喺5月14日買入，買入價係88.15，相應時間約為早上10:13。中華煤氣買入價係18.86，相應時間為早上10:12。中移動買入價係72.9，相應時間為早上10:06。
再睇埋4月嘅供款，中電喺4月11日買入，買入價係90，相應時間約為早上9:55。中華煤氣買入價係19.06，相應時間為早上9:55。中移動買入價係77.2，相應時間為早上9:56。

可見中銀月供股票計劃大概於交易日開市大約半個鐘後(09:55-10:15分)買入。

恆生月供買入時間

恆生嘅月供股票計劃供款日係每月第十日，如非交易日則順延至下一個交易日。因為唔可以用信用卡供款，所以無需理會扣數日。交易日係供款日後第三交易日。官網寫大概會喺交易日開市後約15分鐘開始買入。2019年5月嘅供款時間表如下:

而喺供款日嘅交易時間，以2019年5月供港鐵同領展為例。港鐵喺5月16日買入，買入價係46.694，相應時間約為早上10:00。領展買入價係95.32，相應時間為早上09:40。
再睇埋4月嘅供款，港鐵喺4月15日買入，買入價係48.8，相應時間約為早上9:43。領展買入價係92.15，相應時間為早上9:44。

可見恆生月供股票計劃的確於交易日開市後約15分鐘買入。

買入月供股票詳情

今次同大家睇下買入月供股票嘅收費詳情。之前都講過，月供股票收費分為按計劃或逐隻股票收費。而供款方式則分為預繳同信用卡扣數，但並非每間銀行都提供以信用卡供款嘅服務。

按計劃供款

特式係用一個手續費就可以供多過一隻股票。中銀香港係其中一間提供按計劃供款嘅銀行，同時又可以用信用卡扣數。下圖係完成月供後嘅結單，計劃如下：$1000供中電，$1000供中華煤氣，$500供中移動。銀行按計劃於供款日(5月10日)前喺信用卡凍結$2500信用額，並於供款日後嘅第一個交易日(5月14日)成交。整個5月份供款收取$50蚊手續費，而手續費已包含所有相關費用。而因為中電交易時價格係$88.15，$1000只買到11個單位，所以實際成交金額係$969.65。$50手續費係獨立收取，唔會將中電嘅$1000供款入面扣起$50而令買入中電嘅成交金額<$950。如此類推，整個計劃嘅供款額加上$50蚊手續費，總成本係$2418。

按股票供款

哩種收費模式就係每隻股票需各自付手續費。恆行銀行係其中一間按個別股票供款嘅銀行，同時需要於戶口於供款日繳付相關金額。下圖係完成月供後嘅結單，計劃如下：$6500供港鐵，$6500供領展。銀行按計劃於供款日(5月10日)喺戶口扣除$13000，並於供款日後嘅第三個交易日(5月16日)成交。因為係按股票收費，供兩隻股就有兩張結單。5月份供港鐵嘅手續費係$50，而手續費已包含佣金、稅項等，並於注意事項列出$50包嘅項目。有別於按計劃供款，哩種供款會喺本金扣起$50作手續費，所以實際可用於買入股票嘅金額係$6450。而因為港鐵交易時價格係$46.694，$6450只買到138個單位，所以實際成交金額係$6443.77。剩餘金額係$6.23，並於數天內過返供款戶口。而領展嘅供款都一樣。於5月份嘅供款總共係$12830，而手續費係$100，總成本係$12930。

月供股票費用

影響月供股票費用的因素

買入時 按股票或計劃收費 最低收費 手續費同實際投資額嘅比例 買入後 股東權益手續費 存倉費 終止計劃後費用 賣出時 一般股票收費 以碎股市價或市價賣出

想喺月供股票計劃賺錢，除左要揀啱股票，再穩定供款外，減低手續費都係一個重要嘅考慮因素。所以開始做月供股票計劃前必須睇清楚影響費用嘅因素。

一般股票買賣時需收取經紀佣金(銀行手續費)、交易費及交易系統使用費(予香港聯合交易所)、印花稅(予香港政府)等，種類繁多。而月供股票計劃買入時只需支付一筆過手續費，費用已經包括上述各項收費，簡化交易費用。不過月供股票計劃賣出時，都會按一般收費，即係要俾上述嘅費用。

月供股票買入費用

市面上嘅月供股票計劃主要按兩種模式收費，一係按股票收費(例如恒生銀行、交通銀行、花旗銀行、華僑永亨)，一係按計劃收費(例如中國銀行、集友銀行、工銀亞洲、大新銀行、永隆銀行)。分別係一個計劃可以買多過一隻股票。換言之，如果收費同樣係$50蚊，用前者買兩隻股票要俾$100，用後者只需$50，差異顯而易見。

同普通股票買賣一樣，絕大部分銀行嘅月供股票計劃都有最低收費。一般基本收費為投資額0.25%，而最低收費係$50。除左上述兩種收費模式，影響投資回報率嘅因素仲有手續費同實際投資額嘅比例。假設用最低供款額$1000嚟做月供計劃，就相等於每月需要5%(50/1000)手續費，仲貴過基金認講費，隻股票要升5.3%(1000/950)先回到本，仲未計賣出手續費。

要減少手續費同投資額嘅比例，就要增加投資額。例如投資額係$5000，該比例就係1%(50/5000)。雖然投資額愈高，該比例就愈低，但投資初哥唔輕易拎到咁多錢出黎。所以供到幾多就好因人而異，個人認為大概1%都係可接受，唔計賣出費用，隻股票只需升1%(5000/4950)就回到本。而按計劃收費嘅模式就可以俾大家揀多兩隻股票進一步分散風險。但買入太多不同嘅股票亦可能提高賣出嘅手續費。

買入後的費用

月供計劃每月費用已經包括股東權益(如股息)手續費，只要每月供款，供款期間嘅股東權益活動就唔需要額外收費。而有部分銀行會按月或每半年收取存倉費或託管費。

終止月供計劃

終止計劃一般不另外收費，而生效月份就有所不同。例如於恆生銀行發出終止月供計劃指示，將於下一個月生效。而中國銀行就只需下一個交易執行日前的三個營業日發出指示，該月計劃就可以終止。計劃終止後，戶口內嘅股票會按一般股票收費，例如存倉費、股東權益手續費等。

月供股票賣出費用

賣出月供股票費用同平時賣股票無分別，需收取經紀佣金(銀行手續費)、交易費及交易系統使用費(予香港聯合交易所)、印花稅(予香港政府)等。除手續費外，仲要留意碎股賣出價格，碎股指未滿一手嘅股票。部分銀行可提供市價賣出碎股，但亦有銀行會以碎股市價賣出，碎股市價會比市價低，換言之賣出碎股會獲得較少金額。

月供股票回報

中長期投資

月供股票係中長期嘅投資，要有理想嘅回報，就一定要有耐性。如果你係唔會成日睇股市嘅，月供股票就好啱你。你只要揀啱一隻長遠會升嘅股票，月供一段時間就會賺。如果你係會定時睇股市嘅，就要記住短期係唔重要嘅。唔好輕易改變、取消計劃或賣出股份。係入門篇提過，月供股票最大嘅優點係「成本平均法」，換言之用固定嘅價錢，喺價位高嘅時候買入少啲股數，喺價位低嘅時候買入多啲股數。如果輕易更改或取消計劃，就會失去月供嘅優勢。 

以下係一個實戰嘅例子，由2018年4月開始月供港鐵(66)，每個月供$6500。喺6月開始到11月，股價下跌，總回報係蝕緊錢。但因「成本平均法」，喺低企嘅日子買入到更多嘅股數。自12月起股價上揚，到大概2019年3月已突破歷史高位，迄今已經供有1957股，成本係$84200，連同股息再扣除手續費淨賺$7400(約9%回報)。回顧14個月嘅供款，其實帶來最大利潤嘅就係股價低企嘅時間，因為買入嘅股數平同多。由此可見，要「成本平均法」有效，就不要輕易改動計劃。

月供港鐵

買入日子	成本	買入股數
2018年4月13日 @$43.29	$6407+50手續費	148股
5月13日 @$46.3	$6435+50手續費	139股
6月13日 @$44.02	$6428+50手續費	146股
7月13日 @$42.73	$6409+50手續費	150股
8月13日 @$39.6	$6415+50手續費	162股
9月13日 @$40.95	$6429+50手續費	157股
10月13日 @$39.17	$6425+50手續費	164股
11月13日 @$38.9	$6419+50手續費	165股
12月13日 @$41	$6437+50手續費	157股
2019年1月13日 @$41.96	$6420+50手續費	153股
2月14日 @$43.87	$6449+50手續費	147股
3月14日 @$46.98	$6436+50手續費	137股
4月18日 @$48.80	$6442+50手續費	132股
2019年5月14日總值=$91,196 (@$46.6) 平均買入價=$42.69	總成本=$84,202 總股數=1,957	已派利息=$436 總利潤=$7,430 (+8.8%)

當然，若在低位時增加供款，買入平股嘅數目就會多左。事後孔明，有邊個知道喺2018年6至11月左右，受沙中線醜聞影響嘅港鐵幾時先係跌到底，幾多會回升？如果輕易改動計劃，隨時係愈買愈蝕。如果喺低位因為驚蝕就賣，就會錯過賺錢嘅機會。要記住參加月供計劃嘅原因係減低風險，如果不斷改動，風險緩衝嘅作用就會被抵銷。

影響月供計劃回報的因素 

除左唔好輕易改變底取消計劃外，買月供股票同其他股票一樣，最緊要係搵一啲長遠有增長嘅股票。點樣可以搵到一啲長遠有增長嘅股票有好多方法，要睇技術指標嚟預測升跌係好深嘅學問。

投資初哥應該揀一啲有穩定回報嘅股票，驟眼睇哩啲股票可能冇突出嘅升幅，唔會好似騰訊(700)咁大升(都唔會好似佢喺2018年12月到2019年1月咁大跌)。長遠嚟睇，其實有穩定回報嘅投資股票係最好嘅入門。而最容易搵到哩啲股票嘅方法就係諗下你身邊有咩服務、產品或行業係同生活息息相關嘅。香港嘅電、煤、公共交通等，每一日你都會用到。買佢地係一種防守性嘅投資，升跌嘅幅度唔會好大，但長遠係會升嘅。就以中電(2)同中華煤氣(3)做例子，喺過去5年，可以話兩隻股票係冇跌過，亦跑贏恆指，不斷破頂。

月供股票入門

投資初哥－投資策略

「投資涉及風險」，有賺有蝕係平常不過嘅事，而且要高回報就一定會提升風險。投資初哥缺乏實戰經驗，唔想喺投資市場交一大筆學費，第一樣要做嘅應該係設定投資策略，初哥投資策略應為資產增值，做到每年10%增值已經好好(要知道連由專家管理嘅基金都唔係個個有每年10%回報)。而資產增值嘅同時亦要減低風險。投資風險除受投資種類例如期貨、股票、基金、債券等不同嘅影響之外，亦受投資方法影響。而投資股票市場，部份股票有月供計劃。對於投資初哥或好難長時間監測股市嘅人嚟講，月供股票提供一個低門檻而相對低風險嘅平台為你嘅資產增值。隨著唔同討論區同埋銀行嘅宣傳下，月供股票產品愈來愈多元化，亦有更多人開始接觸哩個平台。

甚麼是月供股票？

喺香港，要買股票一定要一手一手咁買。平時見到嘅股價係指一股股票嘅市值，例如領展(823)，股價係$93.25(2019年5月10日)，每手領展係500股(一手等於幾多股每隻服票都唔同)。即係要買領展嘅股票就要買500股嘅倍數，換言之入場費係500 x 93.25 = $46,625。四萬幾蚊未必係大學生或啱啱出嚟做野嘅朋友可以輕易攞嚟投資嘅銀碼。即使有，投資初哥因為唔識分股價係太高定太低(其實無乜邊幾個人分到)，如果一筆過買入，所承受嘅風險會好大。大部分人結果猶豫不缺，錯過為資產增值嘅機會。而月供股票就俾大家用固定本金，每個月定期買入股票，值得留意嘅係月供計劃每月只需供~$500或~$1000以上(按銀行而定)，而無需一手買入。好似還卡數咁，只要每月用$4000供領展，1年後你就會有一手股票，而股息同紅股等權利都同一手股票無異。

月供股票好處

用最近嘅例子供大家參考月供股票嘅好處。美國喺5月4~5日宣佈向中國貨品加徵至25%關稅，香港股市於6日開始下跌。其中中銀香港(2388)股價一周累跌$2.9，以每手500股計算，一手淨蝕$1450 (-8%)。相信對投資初哥嚟講係駭人聽聞。

咁唔代表中銀香港唔係一隻好(即係會有增長)嘅股票，只係喺5月3日唔係買入嘅好時機。馬後炮當然容易，但對未來又點知道幾時係買入嘅好時機？哩個問題冇乜人識答，但買入價太貴嘅風險係可以透過月供計劃減低。以下係一個例子，假設有兩個人分別用$17,925嚟買中銀香港，一個一筆過於5月3日買入，另一個分5期由1月3日開設每月第3日供款購入。到5月10日，佢地分別擁有500同555股，按收市價計算，一個蝕$1,450，另一個賺$487。同樣用$17,900買入相同股票，賺同蝕嘅分別就在於「成本平均法」，就是將一筆過買入股票時嘅風險分散，從而降低風險。

「成本平均法」

以$17,900投資中銀香港 (假設免手續費)

買入日子	一筆購入	月供計劃
1月3日 @$27.95		買入$3,580 =128股
2月4日 @$30.15		買入$3,580 =118股
3月4日 @$32.85		買入$3,580 =108股
4月4日 @$35		買入$3,580 =102股
5月3日@$35.85	買入$17,925=500股	買入$3,580 =99股
總成本 總股數	$17,925 =500股 (平均買入價=$35.85)	$17,900 =555股 (平均買入價=$32.25)
於5月10日的市值 @$32.95	$16,475 (-$1,450)	$18,287 (+$387)

風險降低代表資產總值的波幅比較少。如果買入嘅股票價格動盪，「成本平均法」可減低損失。如果買入嘅股票價格一直向上，由於平均買入價被拉高，利潤亦相應下降。不過對投資初哥嚟講，寧願賺少d都唔好蝕多d。關於「成本平均法」，詳情請參考Investopedia。

雖然話寧願賺少d都唔好蝕多d，但係月供股票嘅回報一D 都唔低，增長高過通漲，甚至高幾個%都不是難度，稍後再同大家分享月供股票回報。至於收費方面，其實月供股票費用同一筆買入其實差不多，而家仲有好多月供股票優惠，之後再同大家分享。

關於InvestPro

關於InvestPro

理財觀念

有無諗過今日戶口嘅一萬蚊，喺聽日已經唔係同等價值? 銀行存款又真係可以保值? 學如逆水行舟，不進則退；其實理財都係一樣，今日嘅一百蚊去到半年後已經買唔到一百蚊嘅野。香港經濟每年增長3%，如果資產增值追不上哩個速度，變相就係貶值。

資產增值

要喺經濟增長嘅大環境中，維持你嘅資產淨值，甚至希望跑贏大市，除左靠父幹和努力返工之外，善用資產增值工具就係最有效嘅方法。作為一個投入社會工作而資產穩步增值嘅90後，小編希望喺哩度同大家分別一下心得同經驗，係投資市場分一杯羹。