月供股票信用卡優惠

影響月供股票回報嘅因素除左揀啱股票外，降低交易成本都係一個重要嘅因素(詳情請參閱月供股票費用)，而使用信用卡供款則可以享有回贈，進一步減低交易成本。

不過並非所有銀行都接受經信用卡為月供股票計劃供款，而提供信用卡簽賬積分回贈嘅比率、上限同積分兌換現金嘅比例都有所不同，下表提供相關資訊供大家參考。

月供股票信用卡供款

假設你喺中銀、南商或集友連續供款兩年，第25個月開始供$10,000。供多五個月你就有50,000信用卡積分，相等於$200回贈，而五個月供款手續費係$250。換言之每五個月嘅手續費支出係$50，即有4個月嘅

月股股票免手續費

再加上三間銀行不定期有首1-3年供款免手續費優惠，只要連續供款兩年(不限每月供款額)，就可享有手續費買1送4嘅優惠，以極低成本買入股票。

月供股票開戶

要開立月供股票計劃首先要有月供股票戶口。部份銀行同證券行都有提供類似嘅服務，除左計劃收費有所不同外，開戶條件亦有差異。同大家分析下主要分別：

銀行月供股票戶口

• 可用app/網上銀行落單
• 如果於出糧銀行開戶就唔洗煩每月轉錢嘅問題；即使本身無該銀行戶口，亦可到任何分行開戶
• 較可靠，月供計劃總值會愈供愈大，而穩定嘅服務相信會增加大家嘅安全感
• 部分銀行提供市價賣出碎股(如中銀)

• 需開立綜合理財戶口，而綜合理財戶口有最低資產總值要求才可免去額外收費，資產總值包括港幣/外幣存款、股票、基金等
• 月供計劃收費較貴

• 部分銀行優惠只適用於開戶後指定日數內開始供款，換言之雖然於綜合理財戶口內再開月供股票戶口係免費，不過真係準備供款先開戶會比較著數。

證券行月供股票戶口

• 月供計劃收費較平

• 需親臨辦公室開戶(仲要係辦公時間)
• 開戶開低金額
• 交易平台相對無咁穩定(用過8仔，耐不耐個app就會登入唔到)
• 要定期過數
• 市價賣碎股

總括而然，投資月供股票唔係短期嘅投資方法，雖然銀行開戶做月供股票嘅洗費比較大，穩定而方便嘅服務係長遠投資不可或缺嘅元素。當然，如果唔嫌麻煩又唔驚無安全感，證券行都係一個選擇。

月供股票記帳App

月供股票按月買入，如果無好好記低詳情，久而久之就好難知道計劃總成本同回報。喺以前可能要自己用excel記低，再入算式計算，頗為費時，尤其當喺計股息時。依家無論喺ios定android都有免費又易用嘅app嚟記帳，既方便又可隨時查看計劃細節。記帳App有好多，喺決定用邊個App之前不彷諗下唔同嘅因素。

• 收費(市面有好多好用嘅App係免費，無謂嘥錢)
• 顯示即時股價(當埋股票App用)
• 無廣告
• 資料嘅多寡(有啲App有埋美股、A股、外幣、基金甚至虛擬貨幣，一App多用)
• 計息嘅方法(因為有啲App要手動入息)
• 有冇計劃回報走勢同與指數嘅比較(例如同恆指比較)

以下係一個乎合以上條件嘅記帳App(有繁中/簡中/英文):

Webull (ios / Android / 官網)

開戶用推薦碼有>$1000獎

1. 月供計劃總覽:

顯示了計劃總值、當日轉變、當日賺蝕、已獲得利潤等。亦可選擇與不同指數作比較，反映計劃回報同大市嘅分別，亦可選擇不同時段作比較,例如近五天或近一年。要加入新計劃亦很容易，只需按右上角+號，選擇股票再輸入買入資訊，其他資料就會自動顯示。

2. 個別計劃總覽:

個別股票嘅買入成本、當日回報、價值甚至佔所有月供計劃嘅百分比都一覽無遺。

3. 已賣出計劃詳情:

顯示買入成本、回報等

4. 已獲取嘅現金:

顯示派息股票、日期、價值同已獲取嘅現金，無需人手輸入。

5. 個別計劃詳情:

只需每月加入月供記錄，就會顯示平均買入價、擁有股數、成本等，亦顯示除淨日同股息，方便參考能獲得利息嘅股數。

6. 記錄每月供款:

只需填入購入價格、手續費同購入日，以上1-5嘅功能就會自動顯示。

月供股票股權

喺考慮月供股票計劃嘅時候，都可能會諗到派息安排。月供股票買入嘅股份享有嘅股東權益同一手買入嘅股份一樣。即現金或實物派息同紅股等，都會按所擁有嘅股數計算。而代收股東權益的手續費，例如處理股息，都已包含在每月嘅月供計劃費用中。所以不論所持股票每年派多少次息，都唔會衍生額外手續費同交易成本。

不論擁有嘅股數足唔足夠一手，所享有嘅股權都冇分別。以今日(5月31日)除淨嘅中電為例，每股派息$0.63，雖然一手要500股，但即使擁有50股亦會享有相應股息。$31.5嘅股息會全數於派息日存入戶口。

月供股票派息優點

用現金派息嘅情況下，月供計劃長遠能節省代收股東權益的手續費。以恆生銀行(011)為例，一年派4次股息，大部分銀行代收股東權益的手續費為股息嘅0.5%，最低收費係$30。換言之，如果擁有一手股票，每年淨收股息已經需要支付$120，加上存倉費同買入手續費，所需嘅交易成本不菲。而月供計劃不論派息次數，都無需額外繳交手續費。尤其當擁有股數愈多，經一般交易買入嘅股票派息嘅手續費一旦過左$30，就要按比例收費(0.5%)。喺擁有相同股數下，月供計劃都只係會收取每月手續費。換言之，月供計劃所能節省嘅額外手續費支出會隨住所買入股數嘅增長而變得明顯。

月供股票派息缺點

不過喺用紅股派息嘅情況下，月供計劃長遠會蝕底少少。以中華煤氣為例，5月30日紅股除淨，每10股送1股。如果經一般交易買入嘅股票，一手有1000股，派息後就有1100股，下一次再派息就有1210股，如此類推。但用月供計劃買入嘅股數每個月都唔同，好容易累積"零頭"。假如喺除淨日擁有157股，十送一下紅股應為15.7股，但因為唔會有0.7股，所以實際只有15股紅股。而下年就會有(157+15=172) x 1.1 = 189.2，同樣道理只有17股進帳(189-172=17股)。雖然相應金額不大，但亦值得留意。

總而言之，使用月供計劃購入股東權益活動頻密嘅股票(例如一年派四次息)，長遠能節省更多手續費。

月供股票買入時間

月供股票嘅優點係會每月定期買入已選擇嘅股票，雖然唔需要自己衡量即時嘅價格而作出買入嘅決定，但大家應該都有興趣知究竟月供股票係幾時執行交易。

要知道哩個答案，首先要認清三個日期。第一係供款日，供款日係預留相應款項用作交易嘅日子。第二係扣數日，只會喺信用卡供款嘅計劃先有，如果係用戶口自動過數供款就不需理會。第三係交易執行日，即係用預留嘅款項進行交易嘅日子。

中銀月供股票買入時間

以中銀嘅月供股票計劃為例，供款日係每月第十日，如非交易日則順延至下一個交易日。信用卡扣數日係供款前兩個交易日，信用卡戶口嘅信用額會喺哩日開始扣起月供計劃嘅款項。交易日係供款日後第一交易日。2019年5月嘅供款時間表如下:

而喺供款日嘅交易時間，以2019年5月供中電、中華煤氣同中移動為例(請參考買入月供股票詳情)。中電喺5月14日買入，買入價係88.15，相應時間約為早上10:13。中華煤氣買入價係18.86，相應時間為早上10:12。中移動買入價係72.9，相應時間為早上10:06。
再睇埋4月嘅供款，中電喺4月11日買入，買入價係90，相應時間約為早上9:55。中華煤氣買入價係19.06，相應時間為早上9:55。中移動買入價係77.2，相應時間為早上9:56。

可見中銀月供股票計劃大概於交易日開市大約半個鐘後(09:55-10:15分)買入。

恆生月供買入時間

恆生嘅月供股票計劃供款日係每月第十日，如非交易日則順延至下一個交易日。因為唔可以用信用卡供款，所以無需理會扣數日。交易日係供款日後第三交易日。官網寫大概會喺交易日開市後約15分鐘開始買入。2019年5月嘅供款時間表如下:

而喺供款日嘅交易時間，以2019年5月供港鐵同領展為例。港鐵喺5月16日買入，買入價係46.694，相應時間約為早上10:00。領展買入價係95.32，相應時間為早上09:40。
再睇埋4月嘅供款，港鐵喺4月15日買入，買入價係48.8，相應時間約為早上9:43。領展買入價係92.15，相應時間為早上9:44。

可見恆生月供股票計劃的確於交易日開市後約15分鐘買入。

買入月供股票詳情

今次同大家睇下買入月供股票嘅收費詳情。之前都講過，月供股票收費分為按計劃或逐隻股票收費。而供款方式則分為預繳同信用卡扣數，但並非每間銀行都提供以信用卡供款嘅服務。

按計劃供款

特式係用一個手續費就可以供多過一隻股票。中銀香港係其中一間提供按計劃供款嘅銀行，同時又可以用信用卡扣數。下圖係完成月供後嘅結單，計劃如下：$1000供中電，$1000供中華煤氣，$500供中移動。銀行按計劃於供款日(5月10日)前喺信用卡凍結$2500信用額，並於供款日後嘅第一個交易日(5月14日)成交。整個5月份供款收取$50蚊手續費，而手續費已包含所有相關費用。而因為中電交易時價格係$88.15，$1000只買到11個單位，所以實際成交金額係$969.65。$50手續費係獨立收取，唔會將中電嘅$1000供款入面扣起$50而令買入中電嘅成交金額<$950。如此類推，整個計劃嘅供款額加上$50蚊手續費，總成本係$2418。

按股票供款

哩種收費模式就係每隻股票需各自付手續費。恆行銀行係其中一間按個別股票供款嘅銀行，同時需要於戶口於供款日繳付相關金額。下圖係完成月供後嘅結單，計劃如下：$6500供港鐵，$6500供領展。銀行按計劃於供款日(5月10日)喺戶口扣除$13000，並於供款日後嘅第三個交易日(5月16日)成交。因為係按股票收費，供兩隻股就有兩張結單。5月份供港鐵嘅手續費係$50，而手續費已包含佣金、稅項等，並於注意事項列出$50包嘅項目。有別於按計劃供款，哩種供款會喺本金扣起$50作手續費，所以實際可用於買入股票嘅金額係$6450。而因為港鐵交易時價格係$46.694，$6450只買到138個單位，所以實際成交金額係$6443.77。剩餘金額係$6.23，並於數天內過返供款戶口。而領展嘅供款都一樣。於5月份嘅供款總共係$12830，而手續費係$100，總成本係$12930。

月供股票費用

影響月供股票費用的因素

買入時 按股票或計劃收費 最低收費 手續費同實際投資額嘅比例 買入後 股東權益手續費 存倉費 終止計劃後費用 賣出時 一般股票收費 以碎股市價或市價賣出

想喺月供股票計劃賺錢，除左要揀啱股票，再穩定供款外，減低手續費都係一個重要嘅考慮因素。所以開始做月供股票計劃前必須睇清楚影響費用嘅因素。

一般股票買賣時需收取經紀佣金(銀行手續費)、交易費及交易系統使用費(予香港聯合交易所)、印花稅(予香港政府)等，種類繁多。而月供股票計劃買入時只需支付一筆過手續費，費用已經包括上述各項收費，簡化交易費用。不過月供股票計劃賣出時，都會按一般收費，即係要俾上述嘅費用。

月供股票買入費用

市面上嘅月供股票計劃主要按兩種模式收費，一係按股票收費(例如恒生銀行、交通銀行、花旗銀行、華僑永亨)，一係按計劃收費(例如中國銀行、集友銀行、工銀亞洲、大新銀行、永隆銀行)。分別係一個計劃可以買多過一隻股票。換言之，如果收費同樣係$50蚊，用前者買兩隻股票要俾$100，用後者只需$50，差異顯而易見。

同普通股票買賣一樣，絕大部分銀行嘅月供股票計劃都有最低收費。一般基本收費為投資額0.25%，而最低收費係$50。除左上述兩種收費模式，影響投資回報率嘅因素仲有手續費同實際投資額嘅比例。假設用最低供款額$1000嚟做月供計劃，就相等於每月需要5%(50/1000)手續費，仲貴過基金認講費，隻股票要升5.3%(1000/950)先回到本，仲未計賣出手續費。

要減少手續費同投資額嘅比例，就要增加投資額。例如投資額係$5000，該比例就係1%(50/5000)。雖然投資額愈高，該比例就愈低，但投資初哥唔輕易拎到咁多錢出黎。所以供到幾多就好因人而異，個人認為大概1%都係可接受，唔計賣出費用，隻股票只需升1%(5000/4950)就回到本。而按計劃收費嘅模式就可以俾大家揀多兩隻股票進一步分散風險。但買入太多不同嘅股票亦可能提高賣出嘅手續費。

買入後的費用

月供計劃每月費用已經包括股東權益(如股息)手續費，只要每月供款，供款期間嘅股東權益活動就唔需要額外收費。而有部分銀行會按月或每半年收取存倉費或託管費。

終止月供計劃

終止計劃一般不另外收費，而生效月份就有所不同。例如於恆生銀行發出終止月供計劃指示，將於下一個月生效。而中國銀行就只需下一個交易執行日前的三個營業日發出指示，該月計劃就可以終止。計劃終止後，戶口內嘅股票會按一般股票收費，例如存倉費、股東權益手續費等。

月供股票賣出費用

賣出月供股票費用同平時賣股票無分別，需收取經紀佣金(銀行手續費)、交易費及交易系統使用費(予香港聯合交易所)、印花稅(予香港政府)等。除手續費外，仲要留意碎股賣出價格，碎股指未滿一手嘅股票。部分銀行可提供市價賣出碎股，但亦有銀行會以碎股市價賣出，碎股市價會比市價低，換言之賣出碎股會獲得較少金額。